رساله الى الرئيس مبارك

نؤيد سيادتك لفترة جديدة
نكمل خلالها المسيرة السعيدة
وبالمرة فيها نبيع الحديدة
مفيش حاجة ثانية نبيعها خلاص
نؤيد سيادتك لاجل المزيد
من اللي تحقق بفضلك اكيد
بقينا خلاص ع الحميد المجيد
وربك لوحده في ايده الخلاص

نبايع سعادتك ولا حد غيره
كفاية علينا نبرطع في خيره
ونوم شعب مصر العظيمه وشخيره
يقول للحرامي ما تسرق كمان
نبايع سيادته وابنه وحفيده
مفيش زي فكره قديمه وجديده
خرابك يا مالطه حيحصل بايده
ومين فيكي يعني بيسمع اذان
نبوس ايد سيادتك ورجلك كمان
تخليك معانا يا ريس عشان
وجودك ضرورة فرضها الزمان
ومن غير وجودك حقيقي نضيع
دي مصر بتاعتك واحنا ضيوفك
كفايا علينا يا ريس نشوفك
وعاذرين سيادتك وفاهمين ظروفك
عليك بس تؤمر واحنا نطيع
في جزمة سيادتك كلابك يبوسوا
وشعبك ليلاتي يا ريس غموسه
مذله ومهانة و حوجه و مر
لكن يعني ما دمنا شعب انتساب
ودايما و ابدا في حالة غياب
متعملش لينا يا ريس حساب
دي عزبة سيادتك وفيها انت حر
ودستور ما دسترشي موش فارقه خالص
كلام فاضي كله يا فندم بناقص
كفايا علينا الفساد الي ماصص
عرقنا ومعشش و ضارب جذوره
وايه يعني تهري جتتنا البلاوي
يوماتي كوارث.فضايح,رشاوي
كفايا علينا القعاد في القهاوي
بنستنى لما الوريث يجي دوره